ବିଭିନ୍ନ ସ୍ଥାନରେ ଭୂମିକମ୍ପ ଲୋକମାନଙ୍କ ମଧ୍ୟରେ ଭୟର ପରିବେଶ

ଝିଅ ବାହାଘରକୁ ନେଇ ଚିନ୍ତାରେ ପରିବାର

ଡାବୁଗାଁ,,୫/୪: ଡାବୁଗାଁ ବ୍ଲକ ଚଚରାଗୁଡ଼ା ପଞ୍ଚାୟତ ହଳଦୀ ଗ୍ରାମରେ ଶୁକ୍ରବାର ଓ ଶନିବାର ସନ୍ଧ୍ୟାରେ କାଳବୈଶାଖୀର ତାଣ୍ଡବ ଦେଖିବାକୁ ମିଳିଛି। ୪ଟି ଘରର ଆଜବେଷ୍ଟସ୍ ଛପର ଉଡ଼ି ଯାଇଥିବା ବେଳେ ଭୈରବ ମନ୍ଦିର ଓ ନୂତନ ଭାବେ ନିର୍ମିତ ଭୋଗ ମଣ୍ଡପର ଟିଣ ଛପର ଉଡ଼ି ଯାଇଛି| ହଳଦୀ ଗ୍ରାମର ଦୀନବନ୍ଧୁ ନାୟକଙ୍କ ଝିଅ ବାହାଘର ରବିବାର ଥିବା ବେଳେ କାଳବୈଶାଖୀ ପ୍ରଭାବରେ ଘରର ଛପର ସମ୍ପୂର୍ଣ୍ଣ ଭାବେ ଉଡ଼ି ଯାଇ ମୂଲ୍ୟବାନ ଆସବାବପତ୍ର ବର୍ଷାରେ ଭିଜି ନଷ୍ଟ ହୋଇଯାଇଛି। କାଳବୈଶାଖୀ ପ୍ରଭାବରେ କୁଆପଥର ବର୍ଷା ସହିତ ପ୍ରବଳ ପବନ ହୋଇଥିଲା। ପବନର ଗତି ଏତେ ତୀବ୍ର ଥିଲା ଯେ, ହଳଦୀ ଗ୍ରାମର ଦୀନବନ୍ଧୁ ନାୟକ, ବାଲଚାନ୍ଦ ଜାନି, ଜଗବନ୍ଧୁ ଜାନି ଓ ଜୟସିଂହ ଭତରାଙ୍କ ଘର ଆଜବେଷ୍ଟସ୍ ଉଡ଼ି ଯାଇଥିଲା। ଆଜବେଷ୍ଟସ୍ ଖଣ୍ଡ ଖଣ୍ଡ ହୋଇ ପଡ଼ିଥିଲା । କୁଆପଥର ବର୍ଷା ସହ ପବନ ବହୁ ଥିବାରୁ କ୍ଷତିଗ୍ରସ୍ତ ୪ଟି ପରିବାର ପଡ଼ୋଶୀଙ୍କ ଘର ଗୁଡ଼ିକରେ ଆଶ୍ରୟ ନେଇଥିଲେ । ରାତି ୮ଟାରେ କାଳବୈଶାଖୀର ପ୍ରଭାବ କମିବା ପରେ କ୍ଷତିଗ୍ରସ୍ତ ପରିବାର ନିଜ ଘରକୁ ଯାଇ ଦେଖିବା ବେଳକୁ ଘର ମଧ୍ୟରେ ଥିବା ଖାଦ୍ୟଶସ୍ୟ ସହ ବହୁ ମୂଲ୍ୟବାନ ଆସବାବପତ୍ର ସବୁ ବର୍ଷାରେ ଓଦା ହୋଇ ନଷ୍ଟ ହୋଇଯାଇଥିବା ଦେଖିଥିଲେ | ଗ୍ରାମର ଦୀନବନ୍ଧୁ ନାୟକଙ୍କ ଝିଅ ଚୁମୁକିଙ୍କ ବାହାଘର ରବିବାର ଥିବା ବେଳେ ବିବାହ କାର୍ଯ୍ୟ କିଭଳି ହେବ ସେନେଇ ପରିବାର ଚିନ୍ତାରେ ପଡିଛନ୍ତି। କ୍ଷତିଗ୍ରସ୍ତ ପରିବାରକୁ ସରକାରଙ୍କ ତରଫରୁ ତୁରନ୍ତ ଆର୍ଥିକ ସହାୟତା ପ୍ରଦାନ କରିବା ପାଇଁ ଗ୍ରାମବାସୀ ଦାବି କରିଛନ୍ତି | ଖବର ପାଇ ଶନିବାର ଡାବୁଗାଁ ବ୍ଲକ ଅଧ୍ୟକ୍ଷା ବୀଣା ମାଝୀ, ଚଚରାଗୁଡା ସରପଞ୍ଚ ରଞ୍ଜୁ ଭତରା ଓ ରାଜସ୍ବ ନିରୀକ୍ଷକ ସୁଜିତ କୁମାର କାହାଲିଆ ପ୍ରମୁଖ ହଳଦୀ ଗାଁରେ ପହଞ୍ଚି କ୍ଷତିଗ୍ରସ୍ତ ପରିବାରକୁ ମିଶିବା ସହ କ୍ଷୟକ୍ଷତିର ଆକଳନ କରିଛନ୍ତି ।

ଗୋବିନ୍ଦ ତ୍ରିପାଠୀ, ନବରଙ୍ଗପୁର